推荐预测：慕逊破心魔大起多蒙特

今晚德国盃8强重头戏，慕逊加柏主场斗多蒙特；慕逊加柏联赛首循环曾喺主场以4比2击败「蜜蜂兵团」，摆脱之前连续12次对赛输波嘅心魔，今次再喺地头迎战信心倍增，不过论近况多蒙特远胜主队，艾宁夏兰特及查顿辛祖等射手频频有士哥；两军近4次交锋总入球全开3球或以上，捧2.5/3球大最好路。

慕逊加柏计以往一直被多蒙特「食住」，未计今季首循环交手，慕逊加柏已经连续12次输畀对手，好彩首循环慕逊加柏喺主场终于打破宿命赢4比2，虽然佢哋近5场输4场状态麻麻，不过依家排联赛榜中游，既冇降班威胁，争上前列亦唔乐观，反而可以放多啲心力落盃赛，为争晋级唔会踢得保守。

近4次交锋共炮製15球

多蒙特喺各项赛事连赢3场兼轰入10球，前线除有艾宁夏兰特挂帅，英格兰国脚查顿辛祖亦已连续3场联赛有波入，加上辛祖喺对上3圈德盃赛事都有进帐，今仗随时又有斩获。睇番两军近年交手经常合演入球骚，近4次交锋一共炮製15个士哥，总入球全开3球或以上，今场捧大好路。