专家拆局：柏达邦发穷恶大起不来梅

本周德甲压轴戏，云达不来梅主场对柏达邦，榜尾柏达邦近期默默耕耘努力自强，阵上表现每场都有进步，为博奇迹护级已豁出去，势同主队斗攻，黑柴推介中位数3.5球大盘。

柏达邦穷到冇朋友，人哋升班例必开库扩军，佢哋仲要削减开支，今夏将两大升班功臣，加纳进攻中场迪克比堤，同上季首席射手菲腊基文特卖走，收番500万欧元转会费，但冇使过一分一毫买人，只以借用或免签形式搵咗大批失意军人顶档，结果开季头8场联赛只得1分，教练史堤芬包姆加特不断试用唔用球员，而且坚持开波即抢逼同进攻，去到10月底终于赢到杜塞尔多夫开斋，赢咗波之后全队信心明显提升，近两轮先作客神奇赛和多蒙特，上仗迎战另一劲旅RB莱比锡更喺开赛冇耐落后3球劣势下，力追至仅负2比3，连一向弱项嘅耐战力都有所加强，喺呢两支劲旅身上合共入到5球，前线仲踢起咗高速高效嘅麦巴，令包姆加特相信喺德甲对任何球队都有得踢，今晚作客遇上不来梅牌面虽然仲係下风，但要凭反击入波绝对唔难。

双方攻强守弱斗入波

主队云达不来梅教练高菲特亦一直坚持进攻，呢位深受各界好评同球员爱戴嘅少帅，早前因为成绩问题备受压力，事实上不来梅一直受伤兵问题困扰，防线不稳又连仗失运，早前经历过两个半月8战不胜逆境，直至上轮北部打吡作客禾夫斯堡，至凭将士用命同科索沃小将拉斯卡爆发，赢番场救命波，全队士气大振，不来梅向来攻强守弱，今季13轮联赛有12场总入球3球或以上，近5轮有4场总入球达4球或以上，遇上今季6场作客共失15球嘅柏达邦，好易再开入球骚。