专家拆局：米兰打吡细演闷战

王牌前锋斗湿滞

周日凌晨米兰城硝烟四起，AC米兰同国际米兰喺意甲合演同城打吡。AC新帅甘柏路仲未为球队揾到进攻方程式，踢法惟有以守为主，咁啱国米近期进攻同样遇上阻滞，两军都唔想输波丢架，战况随时陷入胶着，中位数2.5球细盘值得留意。

国米卢卡古烦恼多多

国米今季锋线出现大变动，由曼联重金引入比利时前锋卢卡古，顶替效力多年嘅阿根廷射手莫路伊卡迪，前者自然成为「蓝黑军团」季初嘅焦点人物。不过卢卡古加盟后场外风波一浪接一浪，早前对卡利亚里嘅赛事当中就遭对方球迷以种族歧视言行招呼，事后比利时人喺社交媒体上为自己抱不平，仲畀部分国米极端Fans狂串，闹佢唔尊重意大利球迷文化。上仗欧联1比1爆冷畀布拉格斯拉维亚逼和之后，仲爆出佢赛后检讨期间喺更衣室同队友波索域发生口角，呢位比利时前锋加盟冇耐就周围辣火头，难免会影响到自己场上表现。加上曼联旧队友阿历斯山齐士步卢卡古后尘转投加盟后仲未操弗，国米进攻效率都几牙烟。

AC比亚迪克欠支援

AC近期联赛收穫2连胜，不过睇真啲，2仗对手布雷西亚同维罗纳都係今季新升班球队，实力有限，而且「红黑军团」2仗都只係仅胜1比0，上仗仲要靠12码先赢到波，表现差咁啲说服力。新帅甘柏路似乎未度掂进攻乏力嘅问题，阵中虽然有上季斩获22球嘅波兰射手比亚迪克压阵，可惜此子缺乏队友支援，一丁友做箭头孤立无援脚风亦唔顺，想睇佢做出标志性举双枪嘅庆祝入波动作有啲难度。好彩AC近3仗只失1球，全开2球或以下，后防够硬净，呢场料都会踢返稳守战术，唔会畀国米有机可乘，细盘好路。