专家拆局：莱比锡抢签新星誓捣蜂巢

德甲快车上演前列大战，啱啱做番1哥嘅RB莱比锡作客第3位嘅「蜜蜂兵团」多蒙特，两军近绩出色，但相比下莱比锡状态更锐，人脚更齐，少帅拿高斯文扬言要喺德甲冲冠，撞啱多蒙特一双主力防中继续休战，莱比锡受让平半值得捧场。

莱比锡德甲6连胜共入25球，欧联亦小组首名出线，上轮作客对杜塞尔多夫，拿高斯文轮换5个正选都炒对手3蛋，难怪少帅都话满意，佢上季带领贺芬咸两战多蒙特都唔使输，如今带住更强嘅莱比锡又使乜怕呢？中场输血管科斯贝治同箭头尤素夫保臣上轮轮休，今晚蓄锐复出。除咗斗冲冠，今场仲係牙骹战，因为挪威新人王艾宁夏兰特上星期喺经理人安排下，先后访问过莱比锡同多蒙特两会，多蒙特已率先开价，但同夏兰特母会萨尔斯堡关係密切嘅莱比锡，经理明斯拉夫亦讲明想签佢，今仗要畀佢睇清楚边队更值得加盟。

多蒙特欧联奇迹出线，德甲亦3连胜同样弗，不过一对主力防中韦素同汤马士迪兰尼齐养伤，上轮对弱旅缅恩斯未睇到问题，但遇上反击速度极快嘅莱比锡就唔易顶，韦素一直係球队防线第一道屏障，之前佢只缺阵1场德甲，多蒙特就以1比3输咗畀柏林联，何况球队表现始终唔稳定，仲经常慢热，上月尾主场对柏达邦竟然可以半场先落后3球，今晚高手过招，再出现呢啲毛病输埋都唔出奇。