摘要：白礼顿遇强即屈益晒龙Sir今晚英超快车压轴尾场，阿仙奴于主场迎战白礼顿。阿仙奴上场踢到不知所谓，看守领队龙格保为博坐正，首度主场领军不容再失，好彩撞正作客遇强脚软嘅白礼顿，绝对係「龙Sir」开斋、终止...
白礼顿遇强即屈益晒龙Sir
今晚英超快车压轴尾场，阿仙奴于主场迎战白礼顿。阿仙奴上场踢到不知所谓，看守领队龙格保为博坐正，首度主场领军不容再失，好彩撞正作客遇强脚软嘅白礼顿，绝对係「龙Sir」开斋、终止球队8场不胜嘅大好时机，主W热透得1.52倍，有买趁早。
「9仔」阿仙奴今季愈踢愈沉，高层忍无可忍怒炒艾美利，上周委任助教兼球队名宿龙格保做看守领队，但日前作客只能逼和弱旅诺域治2比2，前中后3线隔得太开、防线以多打少仍解唔到围嘅情况冇变过，唔係门神宾特尼奴连番扑救随时输埋，难怪有传高层未必扶正佢。
不过公平啲讲，「龙Sir」喺球队嘅江湖地位，确係镇得住班大帝，上场佢哋係打得积极咗，队长奥巴美扬更身先士卒省两粒，精神面貌係有改善。始终除咗打法之外，阿仙奴喺各项赛事已8场不胜，明显係信心问题，心病还需心药医，球员时代以斗志见称嘅「龙Sir」，呢方面正正係佢强项。好似日前曼联名宿史高斯认为龙格保首场领军应该要着西装，咁先显示出佢对呢位工作嘅自豪感，点知「龙Sir」轻轻一句话自己匆匆上任，件西装仲喺洗衣舖未攞，轻鬆化解一些恶意批评，仲同球员讲要带住快乐嘅心态踢波，乘机帮佢哋减压。
「海鸥」伤兵多恶唔出样
仍喺下游挣扎嘅「海鸥」，查实只落后阿仙奴4分，不过呢支弱旅作客遇强即屈，今季联赛4次造访利物浦、曼城等Big 6球队，唔单止输晒，其中3仗于上半场已经落后，由头输到落尾，全无还手之力，今仗仲有荷西伊斯基亚度、苏利马治、贝拿度费南迪斯等因伤倦勤，恶唔出样。阿仙奴今季联赛主场未输过，「龙Sir」仲唔趁机争取上任后首场胜仗，兼拉票博留任咩，简简单单捧主胜。
